Хто сказаў, што рамантыкі – гэта не модна? Зусім не! І падзеі мінулай суботы гэта ізноў пацвердзiлi. Менш за год таму, у пачатку верасня, у Музеі гісторыі горада, што на вуліцы Леванеўскага, адбылася падзея, аб якой ведалі толькі двое. І што з таго дзіўнага: прадпрымальнік і вядомы музычны дзеяч Зміцер Назараў прызнаўся ў каханні спявачцы, вакалістцы фолк-рок-гурта UNIA Дар’i Трубінай. За прызнаннем адбылася прапанова рукі і сэрца. Неўзабаве дзяўчына аказалася перад няпростым выбарам. З аднаго боку, у Мінску яе чакала плённая творчая праца ў вядомым музычным калектыве (сёлета Дар’я скончыла Беларускi дзяржаўны унiверсiтэт культуры), з другога – у Брэсце яе чакаў Зміцер. Каханне перамагло. У хуткім часе Даша працягне займацца творчасцю ў нашым горадзе (апошні канцэрт з UNIA адыгралі некалькі тыдняў таму), а Зміцер па восені плануе сабраць новы музычны калектыў.

Відавочна, што проста так зарэгістраваць шлюб у Доме грамадзянскіх абрадаў творчыя людзі не маглі. Свой першы сумесны крок у сямейным саюзе яны хацелі зрабіць у вызначальным для абодвух месцы. Неяк адразу на думку ім прыйшоў Музей гісторыі горада, куды Зміцер з Дар’яй і звярнуліся з прапановай аб урачыстай рэгістрацыi шлюбу на музейным падворку. Для супрацоўнікаў культурнай установы такая просьба стала першай за ўсю гісторыю існавання музея. І яны, даведаўшыся аб тым, якая роля належыць музею ў стварэнні гэтага саюза, пайшлі насустрач. Такiм чынам, у суботу, 10 ліпеня, пад вясёлыя джазавыя матывы ў выкананні калектыва «Muzzart», на вуліцы Леванеўскага з’явілася новая сям’я Зміцера і Дар’і Назаравых.